خدمت خلق ٹرسٹ، جامعہ عارفیہ اور عوام ٹیم کی اجتماعی شادی

 خدمت خلق ٹرسٹ، جامعہ عارفیہ اور عوام ٹیم کی تقریب اجتماعی شادی 

ممبرا (ممبئی): خدمت خلق ٹرسٹ، جامعہ عارفیہ اور عوام ٹیم کے زیر اہتمام گزشتہ شب ممبرا میں ایک عظیم الشان اجتماعی شادی کی تقریب منعقد کی گئی۔ ہر سال کی طرح اس سال بھی یہ تقریب مستحق اور ضرورت مند خاندانوں کے لیے باعث رحمت ثابت ہوئی، جہاں 13 ضرورت مند جوڑوں کو رشتہ ازدواج میں منسلک کیا گیا۔ یہ تقریب نہ صرف ان خاندانوں کی خوشیوں کا ذریعہ بنی بلکہ سماجی خدمت کی اعلیٰ مثال بھی پیش کی۔

اس بابرکت موقع پر خدمت خلق ٹرسٹ، جامعہ عارفیہ اور عوام ٹیم نے شادی کے تمام تر اخراجات خود برداشت کیے۔ پروگرام کا مقصد ضرورت مند خاندانوں کو عزت و وقار کے ساتھ خوشیوں کا موقع فراہم کرنا اور معاشرتی یکجہتی کو فروغ دینا تھا۔ منتظمین نے اس موقع پر کہا کہ یہ تقریب دین و انسانیت کی خدمت کی ایک روشن مثال ہے اور آئندہ بھی ایسے اقدامات جاری رہیں گے۔

تقریب کی سب سے خاص بات یہ رہی کہ مرشد گرامی حضرت داعی اسلام بنفس نفیس تشریف لائے اور پروگرام کو اپنی موجودگی سے منور کیا۔ ان کی رہنمائی اور دعاؤں نے نہ صرف اس تقریب کو مزید روحانیت عطا کی بلکہ عوام ٹیم کے حوصلوں کو بھی بلند کیا۔ 

تقریب کے دوران شرکاء نے منتظمین کی کاوشوں کو سراہا اور دعا کی کہ یہ سلسلہ مستقبل میں بھی جاری رہے۔ اس تقریب نے ممبرا کی فضا کو خوشیوں سے بھر دیا اور مستحق خاندانوں کے دلوں میں ہمیشہ کے لیے محبت اور شکر گزاری کے جذبات چھوڑ دیے۔